– Mauritius har like mykje å lære Europa som vi har å lære dei

Universitetet på Mauritius har nyleg oppretta eit senter for framifrå forsking innan grøn utvikling og berekraft med Universitetet i Oslo og Universitetet i London som hovudpartnarar.

Eit nikk til Hylland Eriksen

Målet er å gjere Mauritius til ein truverdig samlingsstad for berekraftpolitikk og å bringe eit autentisk perspektiv frå det globale sør inn i internasjonale debattar om klimatilpassing og havstyresett.

– Gjelda vår til Mauritius og andre små øystatar er enorm. Tidlegare kollega Thomas Hylland Eriksen forstod, før dei fleste av oss, at dei minste stadene på kloden er dei som vert hardast ramma av natur- og klimaendringar, sa Banik i innlegget han heldt under opninga av senteret.

– Ambisjonane våre er difor skyhøge når vi no skal forske på nokre av dei største berekraftsutfordringane som møter det afrikanske kontinentet og små øystatar, seier han.

– Mauritius kan bli leiande SIDS-stat

Senteret skal forske på og undervise om berekraft, med fokus på øystatar i utvikling (small island developing states, SIDS) og deira spesifikke utfordringar med og mulegheiter til grøn utvikling.

Senteret er det andre institusjonelle knutepunktet som veks fram frå Afrika–Europa-klynga for forskingsekspertise på politikkområdet berekraftig utvikling. Det andre er Senter for berekraftig utvikling ved Addis Abeba-universitetet.

Banik ser fram til å engasjere ti doktorgradsstipendiatar frå Mauritius og bidra til lokal kapasitetsbygging.

– Undervisning og rettleiing av dei nye stipendiatane blir gjort i samarbeid med vårt Africa-Europe Cluster of Research Excellence, fortel han.

– Med dette senteret kan Mauritius posisjonere seg som ein leiande SIDS-stat og som eit case study for andre små øystatar som står overfor liknande strukturelle og nye utfordringar: høg sårbarheit for klimaendringar og verdsøkonomien, avhengnad av turisme og handel og vedvarande sosiale ulikskapar, seier Banik.